Aileu, 7 Juñu 2026 – Sua Eminénsia Dom Virgílio Cardeal do Carmo da Silva, SDB, Arcebispo Metropolitana de Dili, prejide Misa Solene no lansa ofisialmente Fatuk Inan ba konstrusaun Igreja Santos Arcanjos iha Estasaun Missionário Madabeno, Paróquia São Francisco Xavier de Dare, Sabadu ne’e.
Selebrasaun eukarístika ne’e partisipa hosi autoridade sivíl no seguransa Munisípiu Aileu nian, inklui Komandante PNTL Munisípiu Aileu, Superintendente Chefe António da Luz, Lic. CG, Prezidente Autoridade Munisípiu Aileu, João Bosco dos Santos, Administrador Postu Laulara, Izau Peregrino Maya, inklui Xefe Suku Madabenu no Aiserimou.
Iha nia omilia, Dom Virgílio hato’o mensajen espirituál profundu ba sarani sira. Nia subliña importánsia konversaun no esperansa iha Nai Maromak. *“Laiha santo ida ne’ebé laiha nia passado, no laiha ema sala-nain ida ne’ebé laiha futuru,”* Dom Virgílio hateten.
Nia esplika katak santu sira mós iha pasadu ho frakeza, maibé sira la husik pasadu domina sira nia futuru. “Nai Maromak sempre fó oportunidade foun. Maski ema sala barak, se nia fila ba Maromak ho laran hakruuk, Maromak bele muda nia vida,” nia hatutan.
Serimónia simu Sua Eminénsia nian la’o tuir tradisaun Timor nian:
1. Tara tais hosi Konsellu Pastoral
2. Boas-vindas hosi Lia-na’in Estasaun Santos Arcanjos Laulara
3. Aprezentasaun hosi grupu moradores no labarik sira
4. Koru hananu, vizita Santíssimu, lok bua-malus, no prosesaun misa
Hafoin misa, realiza serimónia lansamentu Fatuk Inan ba Igreja Santos Arcanjos de Madabenu, marka inísiu ofisiál ba konstrusaun uma-kreda foun ne’e ne’ebé sei sai sentru espirituál ba sarani Estasaun Missionário São Miguel, São Gabriel, São Rafael.
Iha Lansame tu ne hetan partisipasaun husi Komandante PNTL Aileu, Superintendente Chefe António da Luz, akompaña hosi Kordenadora AESPNTL Rosantina Soares Gomes no Komandante Esquadra Laulara Inspetora Chefe Marcelina Barreto, marka prezensa nu’udar forma solidariedade no hametin relasaun entre PNTL ho komunidade. Seguransa ba eventu ne’e lidera hosi Esquadra Laulara, Ekipa RIR, no Seksasaun Tránzitu.
Konstrusaun Igreja Santos Arcanjos ne’e hein katak sei responde ba nesesidade espirituál sarani Madabeno no zona Laulara nian ne’ebé aumenta ba beibeik.
Leave a Reply