CDTL ESTABELESE ESTRUTURA MUNISÍPAL FOUN IHA AILEU HODI HAMETIN DEZEMVOLVIMENTO DESPORTU*

Prezidente eleitu Domingos da Costa sei akumula klube no asosiasaun desportu sira iha munisípiu

*AILEU, 11 Juñu 2025* – Hodi hametin organizasaun desportu iha baze, Konfederasaun Desportu Timor-Leste – CDTL ofisialmente estabelese ona estrutura munisipál foun iha Munisípiu Aileu, Kuarta-feira ne’e.

Iha serimónia ne’e, Prezidente Nasionál CDTL, *Afrânio Xavier Amaral*, hatete katak prezensa estrutura iha nivel munisípiu importante tebes atu implementa programa desportu iha Aileu inklui programa sira iha nivel nasionál.

“Atu implementa programa sira iha Aileu inklui nasional, presiza Prezidente nivel munisípiu. Tanba ne’e ohin ita estabelese tan estrutura foun iha Aileu,” dehan Afrânio Xavier Amaral ba jornalista sira.

Tuir nia, knaar prinsipál Prezidente Munisipál nian mak atu halibur federasaun no asosiasaun sira hodi halo preparasaun ba Festival Nasionál Desportu. Nia mós husu atu iha kooperasaun di’ak ho Administrasaun Postu Aileu Vila – APAM atu nune’e preparasaun bele la’o di’ak liu tan.

Iha fatin hanesan, *Prezidente CDTL Munisípiu Aileu eleitu, Domingos da Costa*, espresa nia gratidaun ba konfiansa ne’ebé fó husi asosiasaun sira hotu.

“Konfiansa ne’e la’ós hanesan orgullu, maibé hanesan responsabilidade ida ne’ebé todan. Ha’u agradese ba asosiasaun sira hotu ne’ebé fó konfiansa,” dehan Domingos da Costa.

Nia akresenta katak iha Aileu, asosiasaun sira ne’ebé eziste ona forma tuir estrutura husi nivel nasionál. Nudar Prezidente foun, nia sei akumula hotu klube no asosiasaun desportu sira iha Aileu.

*Planu Atividade CDTL Aileu:*
Atividade prinsipál ne’ebé Prezidente CDTL Munisípiu sei implementa maka kria dinamika ba movimentu atleta, klube no modalidade desportu sira atu hala’o treinu regular. Nune’e mós hala’o formasaun ba árbitru no treinadór sira hodi prepara di’ak liu ba kompetisaun oioin.

Atividade estabelesimentu estrutura ne’e partisipa husi Prezidente CDTL Nasionál, reprezentante Komandu PNTL Munisípiu Aileu, Administrasaun Postu Aileu Vila – APAM, no reprezentante federasaun desportu sira iha Aileu.