Estudante sira aprezenta rezultadu peskiza iha Salaun Timor Klaran
AILEU – Administrasaun Munisípiu Aileu kongratula Estudante Estajiáriu Universidade da Paz – UNPAZ hamutuk na’in 58, tanba apoiu ona Autoridade liuhusi hala’o peskiza hodi hatene realidade ekonomia iha Munisípiu Aileu.
Estudante estajiáriu UNPAZ, Tersa (30/06/2026), hala’o semináriu iha Salaun Timor Klaran Aileu hodi aprezenta rezultadu durante peskiza ne’ebé sira halo ba Autoridade Munisípiu.
Iha semináriu ne’e, Reprezentante PAM Aileu, Rogério da Conceição, agradese ba estajiáriu sira tanba apoiu ona Autoridade liu-liu iha peskiza.
“Obrigadu ba Estudante sira tanba bele haree direta realidade moris nian iha ita nia munisípiu. Nudar Autoridade ami nafatin koopera no agradese tanba bele halo ona peskiza hodi hatene preokupasaun sira iha munisípiu ne’e”, dehan Rogério.
Iha fatin hanesan, Dekanu Fakuldade Ekonomia UNPAZ, Francisco Nicolau, hateten programa ida ne’e universidade nian ne’ebé ho objetivu oinsá atu hasa’e koñesimentu estudante sira nian no koopera mós ho Governu oinsá atu haree kona-ba sosiedade nia moris, liu-liu iha agrikultura no ekonomia.
Nia dehan, estudante sira ne’ebé hala’o peskiza iha kada suku, objetivu atu identifika problema sira ne’ebé komunidade infrenta iha kada aldeia no suku hodi aprezenta ba Autoridade sira.
Enkuantu, estudante ne’ebé hala’o peskiza iha Aileu hamutuk na’in 58, ne’ebé maioriá mak Aileu-oan.
Atividade ne’e hala’o iha Salaun Timor Klaran Aileu, hetan partisipasaun husi Autoridade Munisípiu, Reprezentante UNPAZ no Komandu PNTL Aileu.
Leave a Reply